欧库西博博马纳特小学缺物理教师

OEKUSI, 25 Agostu 2026 (TATOLI) – Eskola Bázika Filiál (EBF) 1,2,3 Nove Setembru Bobomanat iha Tumin, suku Bobometo, sub-rejiaun Oésilo, Rejiaun Administrativa Espesiál Oekusi Ambeno (RAEOA), presiza tan manorin na’in-rua atu hanorin disiplina Siénsia Fízika Naturaís (CFN).

Koordenadór EBF 1,2,3 Nove Setembru Bobomanat, Jacinto Soni, hato’o nia preokupasaun ne’e ba jornalista sira iha EBF Bobomanat katak situasaun ne’e sira enfrenta kuaze tinan barak ona, nune’e nia rekomenda servisu rejionál edukasaun atu konsidera.

Koordenadór EBF 1,2,3 Nove Setembru Bobomanat, Jacinto Soni. Imajen TATOLI/Abilio Elo Nini

“Iha terseiru siklu, sétimu ano, oitavo ano to’o nonu ano, ami falta profesór na’in-ida ba dixiplina Siénsia Fízika Naturaís (CFN), tanba profesór iha terseiru siklu ne’e, dixiplina espesífiku. Ba primeiru no segundu siklu falta profesór na’in-ida, atu koloka ba klase segundu ano nian,” nia hateten iha EBF 1,2,3 Nove Setembru Bobomanat, ohin.

Manorin-na’in ne’e afirma katak, mezmu laiha profesór ba disiplina fízika ne’e, maibé iha parte eskola halo jestaun ba manorin hodi priénse maske la’ós sira-nia área espesífika.

“Ami la abandona, ami troka malu. Agradese mós ba estudante estajiáriu na’in-rua husi UNTL, sira mai estajíu iha ne’e maka apoia ba atividade aprendizajen ba primeiru no segundu siklu iha segundu ano, maibé sira remata ona iha fulan-Dezembru 2025, husi Janeiru to’o agora ami lorloron troka malu, tanba menus profesór,” nia haktuir.

Nia informa, kona-ba manorin iha primeiru no segundu siklu na’in-lima de’it, loloos na’in-neen, no manorin iha terseiru siklu na’in-hitu, inklui koordenadór eskola mós tenke tama hanorin iha terseiru siklu. Mezmu iha manuál katak koordenadór nia tempu oras ualu kada semana, maibé kontribui nafatin liuhusi oras ualu tanba tenke hanorin iha klase 7º A no B, 8º A no B, no 9º A no B ne’ebé kada semana tenke tama.

“Ami profesór na’in-hitu inklui ha’u, kada profesór turma tenki tau matan ba dixipliña CFN ne’e, hatene ou lahatene tenki buka meiu oinsá atu tama priénse tanba livru iha, mezmu dixipliña ne’e la’ós ami-nia área espesífiku ba ida-ne’e. Profesór sira durante kestiona, tanba defisíl, maibé obrigatóriu tenke tama sela’e abandona estudante sira,” nia hateten.

Notísia relevante:Manorin-na’in éroi títulu laek

Hatan ba preokupasaun ne’e, Diretór Servisu Rejionál Edukasaun Oekusi, Vincêncio Cono, rekoñese katak kada eskola presiza halo jestaun, fahe tarefa servisu, no aprosima nia profesór sira atu disponibiliza tempu tanba ensinu báziku ne’e situadu ho fatin ida de’it.

Diretór Edukasaun Rejiaun Administrativa Espesiál Oé-Cusse Ambeno (RAEOA), Vincencio Cono.Imajen/Abílio Elo Nini

Kona-ba terseiru siklu, profesór ne’ebé la atinje oras servisu 24 kada semana tenke aumenta tan oras letiva iha prosesu ensinu aprendizajen. Tanba ne’e, kona-ba falta profesór, presiza haree ba tarefa ka kargu oráriu.

“Disiplina CFN, profesór sira iha hotu, maibé konforme husi jestaun dirijente eskola, tenke iha aprosimasaun másimu ba profesór hothotu, seraké eskola referida profesór sira atinje hotu oras 24 pur semana ba terseiru siklu ensinu báziku, no sé mak iha abilidade, entaun tenke iha jestaun ba profesór tanba livru manuál iha hela eskola idaidak, bele utiliza ba hanorin estudante sira,” nia hateten.

Entretantu, totál estudante dadaun hala’o hela estudu iha EBF 1,2,3 Nove Setembru hamutuk na’in-447 ho totál profesór na’in-13.

Notísia relevante:Garante kualidade edukasaun, presiza atualiza kurríkulu, polítika, infraestrutura no manorin-na’in

Jornalista: Abílio Elo Nini

Editór: Rafael Ximenes de A. Belo