贝博努克诈骗呼叫中心案：帝力初审法院对96名被告每人采取3000美元保释金

DILI, STLTIMORLESTE.com – Tribunal Judisial Primeira Instansia Dili (TJPID) iha loron Segunda nee (13/07/2026) liu husi despaisu ikus ba kazu Jogu Online Scamming Call Centre Bebonuk, deside aplika medida ba arguidu nain 96.

Iha despaisu nee, Juiz Ivan Patrocenio deside aplika medida ba arguidu nain 96, mak hanesan medida kausaun kada arguidu US$ 3.000, hanesan garantia ida atu arguidu sira labele halai sai, se sira halai sai mak osan nee afavor ba Estadu. Tribunal mos fo prazu loron 10 ba iha arguidu sira atu selu kausaun nee, se arguidu sira la selu mak Tribunal sei halo fali alterasaun husi medida kausaun ba iha medida Prizaun Preventiva.

No medida Proibisaun de Auzensia, Tribunal sita arguidu sira nia pasaporte hodi asegura sira ba iha prosesu investigasaun. No Tribunal mos deside atu arguidu sira kontinua mantein Medida Termo Indentidade Rezidensia (TIR) neebe antes nee iha ona.

Arguidu sira lori mai iha Tribunal, no Ministeriu Publiku promove ho krime Jogu Ilisitu, Asosiasaun Kriminoza, Brankamentus Kapitais, Burla Informatika.

Antes nee iha alegasaun Ministeriu Publiku husu Tribunal aplika medida Proibisaun Auzensia no medida Kausaun US$ 3.000 kada arguidu, no arguidu nain ida MP husu Tribunal atu aplika medida Kausaun US$ 5.000, tanba deskonfia nia mak manejer ba Jogu Scam Call Center, iha area Bebonuk.

No parte Defeza ba arguidu nain neen (6), Advogadu Privadu Pedro Camões aseita alegasaun MP nian, neebe husu Tribunal atu aplika medida Proibisaun Auzensia no medida Kausaun US$ 3. 000 ba kada arguidu no iha arguidu nain ida mak medida Kausaun US$ 5.000.

Defeza ba arguidu nain 90, Advogadu privadu Octavio Cardozo no Januario Martins husu Tribunal atu aplika medida Proibisaun Auzensia no medida Kausaun US$ 2.000 ba nia kliente nain 90.

Prosesu primeiru interogatoriu nee prezide husi Juiz Ivan Patrocenio, Ministeriu Publiku (MP) reprezenta husi Prokurador João Marques, arguidu sira hetan asistensia legal husi Advogadu Privadu nain tolu, Pedro Camões, Januario Martins no Octavio Cardozo.

Rekorda katak, ekipa konjunta husi Servisu Sekreta, Polisia Nasional Timor Leste (PNTL) no Polisia Sientifika Investigasaun Criminal (PCIC) detein sidadaun estranjeiru ho nasionalidade Xines, iha operasaun nee halao iha Aldeia 20 de Setembru, Suku Bebonuk, Munisipiu Dili.

Operasaun nee halao tanba deskonfia katak grupu sidadaun estranjeiru sira nee envolve iha atividade jogu online ilegal no scam call center.

Durante operasaun, ekipa autoridade sira prende sasan eletroniku barak, inklui komputador hamutuk unidade 88, laptop unidade 13 no telemovel neebe uza hanesan evidensia ba investigasaun.

(ter)