东帝汶将主办第十九届葡语国家司法部长会议

DILI, 05 Agostu 2026 (TATOLI)—Ministru Justisa, Sérgio da Costa Hornai, kaurta ne'e, aprezenta ba Konsellu Ministru kona-ba preparasaun atu sai uma-na'in ba Konferénsia Ministru Justisa País sira Lian Portugés nian (CMJPLOP, sigla iha lian portugés) ba da-XIX iha Dili, Timor-Leste

Ministru Justisa, Sérgio da Costa Hornai, hateten ohin nia halo aprezentasaun kona-ba programa preparativu konferénsia CPLP Ministru Justisa nian iha fulan Outubru 2026.

“Nune'e sei halo konferénsia mandatória ida mai husi nasaun CPLP, Sekretariadu CPLP nian.
Tanba ita hanesan Estadu membru, entaun ohin ami aprezenta programa ba eventu refere,” Ministru Sérgio Hornai hateten ba jornalista sira hafoin ramata reuniaun Konsellu Ministru iha Palásiu Governu.

Governante ne'e dehan, atividade ne'e ho tema Jerál ida ne'ebé sei ko'alia kona-ba jogu online ne'ebé agora la'o daudauk ka scamming ne'ebé akontese hotu.

Nune'e, nia dehan, iha eventu ne'e sei halibur responsável governamentál nian ba área Justisa husi Estadu-membru sira CPLP nian.

Konferénsia ne'e hanesan mekanizmu importante ida ba konsertasaun no kooperasaun iha ámbitu jurídiku no judisiáriu iha espasu luzófonu, hodi permite análize ba kestaun sira ho interese komún, avaliasaun ba inisiativa sira-ne'ebé la'o daudaun, no identifikasaun ba área foun sira ba kolaborasaun.

Eventu ne'e sei aprezenta mós serbisu preparatóriu sira-ne'ebé kobre koordenasaun inter-institusionál no aspetu lojístiku, protokolu, seguransa no apoiu tékniku ne'ebé presiza hodi hala'o eventu ne'e.

Enkuantu konferénsia ne'e sei hala'o iha Timor-Leste iha ámbitu prezidénsia Pro Tempore CPLP nian, reforsa kompromisu nasaun liuhusi aprofunda kooperasaun jurídika entre Estadu-membru sira no reforsa Komunidade.

Jornalista : Alexandra da Costa

Editór : Cancio Ximenes