社会团结和包容部在包考修订国家残疾人行动计划

BAUKAU, 12 Agostu 2026 (TATOLI)—Governu liuhusi Ministériu Solidariedade Sosiál no Inkluzaun (MSSI) halo revizaun ba Planu Asaun Nasionál (PAN) foku ba Ema ho Defisiénsia (EhD) iha Baukau.

Ministra Solidariedade Sosiál no Inkluzaun, Verónica das Dores, esplika revizaun PAN ba EhD ne’e husi tinan 2021-2030 no kontinua ba faze daruak 2026 to’o 2030 ne’ebé antes ne’e aprova ona liuhusi rezolusaun Governu Númeru: 07/2022, iha-ne’ebé sai hanesan instrumentu estratéjiku ba liña ministeriál inklui institusaun hotu hodi integra inkluzaun iha politika, programa no orsamentu sira.

“Mekanizmu servisu sira-ne’e EhD envolve diretamente iha prosesu planeamentu, monitorizasaun no avaliasaun ne’ebé reflete tebes implementasaun prinsípiu. Ita la husik ema ida iha kotuk. Ha’u agradese ba sira la’ós defisiénsia de’it iha fíziku, maibé sira iha intelektuál,” Ministra Verónica das Dores hateten bainhira abertura ba workshop no revizaun PAN EhD iha Vila Nova, Baukau, Kuarta ne’e.

Governante ne’e ralata durante implementasaun PAN faze dahuluk husi tinan 2021 to’o tinan 2025, observa katak liña ministeriál sira hanesan Ministériu Obra Públika (MOP), Ministériu Transporte no Komunikasaun (MTK), Ministériu Ensinu Superiór no Kultura (MESK), MSSI, Ministériu Juventude, Desportu no Arte Kultura, Sekretáriu Estadu Igualdade (SEI), Sekretáriu Estadu Komunikasikan Sosiál (SEKOMS) no SEFOPE mak implementa ona integra asaun inkluziva iha planu servisu.

Aleinde ne’e, totál liña ministeriál hamutuk 13 mak sai implementadór ba PAN ba EhD husi 2021-2030, enkuantu ministériu rua hanesan Ministériu Administrasaun Estatál (MAE) no Ministériu Finansa (MF) iha faze observasaun.

“Balun ne’ebé seidauk implementa hotu ita prezisa halo ajustamentu, tanba mudansa iha estrutura Governu ho evidénsia foun maihusi dadus Sensu tinan 2022 nune’e revizaun PAN ba EhD faze daruak sai pontu oportunidade atu hadi’a ba tinan 2026 to’o 2030,” Verónica das Dores akresenta.

Entretantu, iha atividade revizaun PAN ba EhD referida, partisipa husi grupu traballu tékniku no reprezentante liña ministeriál sira.

Jornalista: Natalino Belo

Editór: Xisto Freitas da Piedade