MAKLN将在埃尔梅拉安葬1600具遗骸

Ermera, 27 Jullu 2026 (TATOLI)– Ministériu ba Asuntus Kombatentes Libertasaun Nasionál (MAKLN) sei realiza “Seremónia Prestasaun Honras Fúnebres Estadu nian ba Restos Mortais” iha Aldeia Palimano, Suku Fatuquero, Postu Administrativu Railaco, Munisípiu Ermera, husi loron 26 to’o 29 fulan-Jullu 2026.

Seremónia ne’e hanesan kompromisu IX Governu Konstitusionál nian hodi kontinua dignifika no valoriza kontribuisaun Kombatentes Libertasaun Nasionál sira ne’ebé mate ka lakon iha luta ba Independénsia Nasionál.

Tuir komunikadu ne’ebé TATOLI asesu husi mídia MKLN, atividade ne’e bazeia ba Konstituisaun RDTL Artigu 11 kona-ba Fó Valór ba Rezisténsia no mós Estatutu Kombatentes Libertasaun Nasionál, Lei Númeru 3/2006 no nia alterasaun sira.

Tuir dadus husi MAKLN, Restos Mortais ne’ebé atu hakoi iha tinan ida-ne’e hamutuk rihun-lima atus-rua haat-nulu resin-haat, ka 5,244. Husi númeru ne’e, kompostu husi Militár hamutuk 194 no Sívil hamutuk 5,050.

Husi totál ne’e, Restos Mortais ne’ebé konsege identifika ona identidade no naturalidade hamutuk 4,168. Sira mai husi Postu Administrativu Atsabe 2,798, Ermera Villa 234, Hatulia 357, Letefoho 247, Railaco 466, sein Postu Administrativu 8, no husi li’ur Ermera hamutuk 58.

Enkuantu Restos Mortais ne’ebé seidauk identifika, ka deskoñesidu, hamutuk 1,076. Sira mai husi Atsabe 271, Ermera Villa 65, Hatulia 84, Letefoho 62, Railaco 77, sein Postu Administrativu 3, no husi li’ur Ermera hamutuk 64.

Urnas 1,600 sei hakoi iha loron 28-29 fulan-Jullu

Tuir planu, totál urnas ne’ebé sei hakoi iha loron 28 to’o 29 Jullu hamutuk rihun-ida atus-neen, ka 1,600.

Husi númeru ne’e fahe ba rua: Urnas Koñesidus ho Koletivus hamutuk 1,494, no Urnas Deskoñesidus hamutuk 106.

Distribuisaun tuir postu mak hanesan: Atsabe 947, Ermera Vila 126, Hatulia 161, Letefoho 120, Railaco 190, sein Postu Administrativu 5, no husi li’ur Ermera 51.

Ajenda ne’ebé sei hala’o durante seremónia mak Seremónia Kulturál, Missa no Bensaun ba Urnas, no ikus liu mak prosesu haloot ba Restos Mortais.

*Governu Kontinua Dignifika Heróis Nasionál*
MAKLN mós fó hanoin fali katak iha tinan 2025 nia rohan, Governu halo ona seremónia hanesan iha munisípiu 3. Iha Outubru 2025 haloot ona Restos Mortais 60 iha Jardím Heróis Fuiloru, Lautem. Iha Novembru 2025 haloot tan 105 iha Manatuto Villa. No iha Dezembru 2025 haloot 50 iha Likisa.

Aleinde ne’e, iha governasaun sira anterior mós konsege hakoi ona Restos Mortais ho númeru agregadu 2,024 iha Jardím Heróis da Pátria. Detallu mak hanesan: 672 iha Metinaro, 259 iha Likisa, 34 iha Manufahi, 70 iha Aileu, 479 iha Dubu-Uai Quelicai Baucau, no 510 iha Jardím dos Heróis Dara-Mutu Laga Baucau.

Ho seremónia ne’e, Estadu Timor-Leste reafirma nia kompromisu atu respeita, dignifika no valoriza sakrifisiu boot husi Kombatentes Libertasaun Nasionál sira ba rai no povu Timor-Leste.

Jornalista: Hortêncio Sanchez