DONGDIWEN BRIEF
DILI, 12 dezembru 2024 (TATOLI)–Dosente Filozofia iha Institutu Superiór Filozofia no Teolojia (ISFIT), Francisco da Costa, rekomenda atu aumenta unidade ida kona-ba relasaun ema ho natureza.
“Ha’u hakarak rekomenda se bele aumenta pontu ida-ne’ebé toka kona-ba relasaun entre ema ho natureza tanba umanizmu kriasaun ne’ebé Papa Francisco defende Laudatus,” Dosente Filozofia hato’o iha ISFIT Fatumeta, kinta ne’e.
Nia konsidera, kestaun ne’e presiza implementa no nesásariu hodi aumenta tanba manorin no estudante presiza hatene relasaun ema ho natureza iha Timor-Leste.
Notísia relevante : Líder relijiozu kuda ai-oan iha resintu ISFIT
Iha sorin seluk, Prezidente Ezekutivu Komisaun Nasionál Edukasaun Katólika Timor-Leste (CONECTIL, sigla portugés), Padre António Quenser do Balino do Carmo, dehan, nesesáriu hodi aumenta unidade ida-ne’e.
“Ami konsidera sujestaun ida-ne’e tanba idea ida-ne’e di’ak no atu aumenta subtema ka bele sai temátika ida ba relasaun entre ema ho natureza. Nune’e iha Manual désimu segundu ami koloka tiha ona iha dokumentu ofisiál Igreja nian. La’ós nu’udar temátiku ida maibé sai submete ida-ne’e sei tama iha manuál désimu segundu,” Amu Quenser, hateten.
Nune’e mós, Ministra Edukasaun, Dulce de Jesus Soares, apresia no agradese ba Igreja Katólika ne’ebé lansa tan ona livru manuál alunu edukasaun morál no relijiaun Katólika ba eskolaridade.
“Ita agradese ba Igreja Katólika no konfisaun relijiaun seluk ne’ebé sai parseiru Ministériu Edukasaun nian, liu-liu foti responsabildade hodi prepara matéria ba edukasaun relijiaun nian. Saida mak relijiaun Katólika no konfisaun relijiaun seluk ami sei nafatin iha prátika atu nune’e responde ba ita-nia oan sira-nia nesesidade iha eskola,” Ministra tenik.
Jornalista : Osória Marques
Editora : Julia Chatarina
来源：TATOLI 国家通讯社。本站保留原文入口，方便读者交叉核验。
