商贩与社区要求博博纳罗优先修复巴利博市场

BOBONARU, 23 Jullu 2026 (TATOLI)-Negosiante no komunidade husu ba Autoridade Munisípiu Bobonaru atu tau prioridade ba reabilitasaun merkadu iha postu administrativu Balibó, tanba infraestrutura atuál kuaze aat no la seguru atu halo atividade negósiu, liuliu iha tempu udan no anin.

“Zinku di’ak hela, más nia ai-riin balun haliis tiha ona, ai balun mós mamar no besik tohar. Udan ho anin ne’e ami ta’uk atu fa’an sasán iha laran, ne’e mak balun sai fali bá halo uma-oan iha li’ur hodi fa’an. Depois iha laran ne’e mós ema ladún tama, ema sosa mak sira iha oin ne’e nian”, vendedór Domingos Tavares hateten, ohin.

Komunidade Balibó, Marcos Lopes, rekomenda ba Governu atu konsidera problema ne’e iha planu orsamementu tinan 2027 hodi rezolve, tanba espasu merkadu ne’e kloot.

Nia dehan problema ne’e líder komunitáriu sira aprezenta beibeik no hatama ona iha Asembleia Postu Administrativu (ASPA) atu rezolve ho Orsamentu Planu Dezenvolvimentu Integradu Munisipál (PDIM), maibé to’o agora laiha rezultadu.

Notísia relevante: SSK Balibo presiza médiku-parteira hodi koloka ba postu saúde Lima

“Ami husu Governu haree para hadi’a halo luan atu fa’an sasán iha laran, tanba fatin la to’o. Iha merkadu laran ne’e meza hira de’it, kuaze ema fa’an modo, malus no bua de’it. Ba sasán seluk hanesan na’an, manu no seluk tan ne’e sira iha li’ur de’it”, nia dehan.

Merkadu funsiona iha kada segunda-feira no negosiante sira mai husi postu administrativu Maliana, Kailaku, Bobonaru no Atabae.

Notísia relevante: EDTL halo manutensaun ba liña elétrika iha Maliana-Balibó

Jornalista: Sergio da Cruz

Editora: Maria Auxiliadora