66名申请者竞逐东帝汶最高法院和上诉法院法官职位

DILI, 07 Agostu 2026 (TATOLI)—Komisária ba Komisaun Rekrutamentu Juíz, Carmelita Caetano Moniz, informa, aplikante hamutuk na’in-66 mak konkorre ba vaga Juíz Supremu Tribunál Justisa (STJ) no Tribunál Rekursu (TR).

“Husi númeru ne’e aplikante ne’ebé aplika ba vaga ba Juíz Supremu Tribunál Justisa iha na’in-38, kompostu husi Juíz 28, Prokuradór Repúblika na’in-haat no Jurista na’in-haat, enkuantu ba konkorrente sira ne’ebé konkorre ba iha vaga Juíz ne’ebé atu tuur iha Tribunál Rekursu hamutuk na’in-28,” Carmelita Moniz hateten ba Jornalista sira liuhusi konferensia imprensa iha sala STJ, Kolmera, Sesta ne’e.

Nia dehan, vaga ba STJ ne’e nia kritériu mak aplikante tenke iha esperiénsia Juíz tinan-10, nune’e mós aplikante ba vaga Juíz Tribunál Rekursu tenke mós priense tinan-10.

Notísia relevante : STJ Portugál prontu apoia reforma setór justisa iha TL

Ba kandidatu sira ne’ebé mak selesiona iha prosesu selesaun dokumentu sei halo teste iha loron 18 Setembru 2026.

“Juri sira sei mai husi Portugal, to’o iha Timor-Leste iha loron 15 Setembru agora no fatin ba iha teste ne’e iha edifísiu Supremu Tribunál Justisa,” nia akresenta.

Kandidatu sira ne’ebé mak liu iha prosesu selesaun dokumentu ne’e, Komisaun sei notifika no sira-nia naran sei públika iha Sentru Formasaun Juridiku Judisiáriu.

Enkuantu ba kandidatu sira ne’ebé la liu iha prosesu entrevista, juri sei fó tempu hodi halo reklamasaun durante prazu loron-15.

“Juri iha tempu loron-10 para fó resposta ba kandidatu sira-nia reklamasaun,” nia katak.

Iha fatin hanesan, Komisáriu Komisaun Rekrutamentu ba Juíz, Avelino Coelho, agradese ba kandidatu sira ne’ebé ho vontade tomak konkorre ona ba vaga ne’e no espera iha sorte di’ak.

“Ami agradese tanba sira iha vontade no korajen duni atu aplika vaga Supremu Tribunál Justisa, hamutuk ema na’in-60-resin, ne’e pozitivu duni tuir espetasaun ami komisaun nian,” nia hato’o.

Juíz Embargadór na’in-haat konkorre vaga

Komisária ba Komisaun Rekrutamentu Juíz, Carmelita Caetano Moniz, hateten, atuál Juíz Embargadór na’in-haat iha TR hanesan Deolindo dos Santos, Maria Natércia Gusmão, Jacinta Coreira no Duarte Tilman konkorre mós ba vaga ne’e.

“Sim, sira konkorre hotu, foin daudaun sira halo termu aseitasaun hodi mantein funsaun iha Tribunál Rekursu no konkorre vaga iha Supremu Tribunál,” Carmelita Moniz informa.

Nia dehan, iha Lei Organizasaun Judisiária ne’e fó biban Juíz na’in-ida ne’ebé hili husi Parlamentu Nasionál, rua husi Prokuradoria Jerál Repúblika no ida mak jurista profisionál.

“Vaga ne’e la’ós eleminatóriu maibé prosesu kuandu iha insatisfasaun, konkorrente sira bele hato’o reklasaun ba juri durante loron-15 nia laran no juri iha loron 10 atu fó resposta,” nia tenik.

Jornalista : Natalino Costa

Editora : Julia Chatarina