国民议会批准授予前葡萄牙记者安东尼奥·桑帕约国籍

DILI, 03 juñu 2024 (TATOLI)—Parlamentu Nasionál (PN), segunda ne’e, liuhusi reuniaun plenária aprova projetu rezolusaun númeru 41/VI(1a) kona-ba atribuisaun nasionalidade ba António José Garcia Sampaio, husi altu no relevante serbisu prestadu iha Timor-Leste ho povu.

“Rezultadu votasaun, a-favór 35, kontra 15 no abstensaun rua (2), ne’ebé rezolusaun ne’e pasa,” Prezidente Parlamentu Nasionál, Maria Fernanda Lay, hato’o iha sala plenária Parlamentu Nasionál.

Tuir testu rezolusaun ne’ebé Sekretária Meza PN, Deputadu Virginia Ana Belo, lee sai iha sala plenária katak durante iha okupasaun Indonézia jornalista António Sampaio, nu’udar ema ida hanesan defensór ba kauza timorense fó sai kona-ba situasaun nasaun no luta indepedénsia iha Portugál liuhusi meiu komunikasaun sosiál hanesan Lusa, Diário Notícia, Público, Expresso, Jornál de Notícia, RTP, TVI, RDP, Rádio de Renicencia no Rádio Nova iha Austrália, liuhusi jornál, rádiu no televizaun hanesan Austrália ou espesiál broascating service no iha mundu liuhusi órgaun komunikasaun oioin sira seluk iha nasaun oioin.

Iha ámbitu ninia atividade destaka reportajen kona-ba deklarasaun ikus vida Koni Santana, akompaña permanente komunidade timoroan iha pontu barak iha Ásia, Oseania, Europa, divulgasaun masakre Santa Crus no diseminasaun notísia no informasaun husi fonte rezisténsia no Igreja katólika durante iha okupasaun.

Iha tinan 1991-1992, rekupera ho Prezidente Repúblika, José Ramos Horta iha East Timor News Agency (ETNA) esensiál ba divulgasaun iha estranjeiru ba timoroan nia luta kontra okupasaun Indonézia.

Iha 1999, nu’udar jornalista dahuluk estranjeiru reside iha Timor-Leste responsável husi abertura delegasaun Ajénsia Lusa, iha período naruk no to’o daudaun publika notísia barak kona-ba nasaun.

Iha 2019, António Sampaio hetan kondekorasaun husi Prezidente Repúblika, Francisco Guterres ‘Lú-Olo’ atribui medala orden Timor-Leste.

Sentidu ne’e forma simboliza altu no relevante serbisu prestadu ba povu timorense no nasaun, Parlamentu Nasionál rezolve tuir termu artigu 92 konstituisaun repúblika no artigu 13 lei númeru 9/2002, 18 outubru, hanesan tuir mai;

Dahuluk, konsede nasionalidade timorense António Sampaio husi prestasaun altu no relevante serbisu ba nasaun.

Daruak, rekomenda ba Governu prosede rejistu prosesu naturalizasaun António Sampaio no emita ho maiór posível ba dokumentasaun hotu relevante.

Projetu rezolusaun ne’e aprezenta husi proponente Deputadu CNRT, Duarte Nunes.

Duarte Nunes hateten, nia parte subskreve tanba hanoin situasaun ne’ebé António Sampaio hasoru la’ós primeira-vés, PN halo ona rezolusaun ba ema estranjeiru lubun ida, tanba ne’e António Sampaio nia iha situasaun hanesan ho sira.

Deputada FRETILIN, Nurima Ribeiro Alkatiri, hateten nia parte iha respeitu boot ba António Sampaio.

“Koñese António Sampaio no família no ha’u koñese no rekoñese serbisu sira-ne’ebé António Sampaio hala’o durante tinan barak nia laran no solidariedade ne’ebé nia fó hamutuk ba ita-nia kauza luta indepedénsia,” nia dehan.

Maibé haree ba Estadu, Deputadu Nurima iha preokupasaun ba rezolusaun ida-ne’e tanba bele loke no lori risku presedente ida atu aban bainrua ema-ne’ebé besik Prezidente Repúblika ka ukun na’in sira seluk atu haksoit prosedimentu legál ne’ebé bazea ba lei nasionalidade vigór hela.

Nia hateten, iha lei nasionalidade hateten katak atribuisaun nasionalidade altu no relevante serbisu prestadu ne’e iha PN nia kompeténsia, maibé ita tenke kuidadu mós atu labele kria sentimentu diskriminasaun no favoritizmu iha ita-nia sosiedade laran, ita iha ema barak ne’ebé tuir hela prosedimentu atu hetan nasionalidade, se la sala iha fulan ida ka rua liu ba Ministériu Justisa (MJ) loké fila-fali ba prosedimentu atu hetan nasionalidade tuir lei nasionalidade.

“Ha’u fiar katak, António Sampaio prienxe kriteriu sira-ne’e iha ne’e kle’ur ona, tanba ne’e ha’u haree laiha nesesidade atu PN aprova rezolusaun ida. Se António Sampaio bele tuir prosedimentu legál Ministru Justisa karik bele fó atensaun espesiál bazeia ba dokumentu sira-ne’ebé ohin aprezenta,” nia hateten.

Notísia Relevante: Paresér komisaun A konsidera atu António Sampaio mak hato’o rekerimentu

Jornalista : Nelson de Sousa

Editór : Cancio Ximenes