教育部：568名通过笔试的教师将紧急分配

DILI, 19 abríl 2024 (TATOLI)—Diretora Nasionál Rekursu Umanu iha Minsitériu Edukasaun, Anita Tavares, hateten kandidatu profesór klasifikadu 568 ne’ebé pasa iha ezame eskrita ne´e sei koloka urjentemente ba eskola sira-ne’ebé presiza.

Notísia Relevante: KM autoriza loke teste bolsa kandidatu faze daruak

“Kona-ba kolokasaun ba sira-ne’ebé klasifikadu ka passa iha teste ne’e hodi prienxe vaga manorin iha eskola sira, ida-ne’e sei sai responsabilidade husi Ministériu Edukasaun nian, konforme informasaun falta profesór iha eskola sira liuhusi kuadru pesoál ne’ebé iha. Tanba ne’e, sei koloka profesór 568 urjentemente ba eskola ne’ebé presiza, ne’ebé tuir kuadru pesoál identifika,” atuál Diretora Nasionál Rekursu Umanu ne´e hateten ba jornalista sira, iha konferénsia imprensa kona-ba rezultadu ezame eskrita bolsa kandidatu profesór, iha sala Komisaun Funsaun Públika (KFP), sesta ne’e.

Kandidatu profesór hamutuk 13.021 neʼebé pasa selesaun dokumentu ne´e iha kandidatu 11.273 maka partisipa iha teste, ida-ne´e signifika kandidatu 1.748 admitidu iha selesaun dokumentu mak la marka prezensa iha teste ne’e.

“Sira-ne’ebé pasa mak pasa ho valór 60 ba leten hamutuk 568 ne´ebé kompostu husi feto hamutuk 332 no mane hamutuk 236,” nia dehan.

Sira-ne’ebé fahe ba grupu rekrutamentu hanesan Pre-Eskolár hamutuk 34, Ensinu Báziku 1º no 2º ciclo hamutuk 170, ba área koñesimentu Ensinu Báziku 3º ciclo, hanesan língua tétun iha 62 mak pasa ho valór 60 ba leten.

Língua portugeza iha ema hamutuk 106 mak pasa, língua ingleza iha 48, matemátika iha 45, siénsia naturál iha 30, siénsia sosiál iha 38 no dezenvolvimentu pesoál iha 35.

“Rezultadu ne’e la tuir lugares ne’ebé ME presiza, tanba ne’e parte relevante sei tuur hamutuk hodi deside vaga daruak. Ida-ne’e ita sei anúnsia tempu badak, vaga ne’e sei nakloke ba públiku hotu atu kompete,” nia hateten.

Baze legál ba programa bolsa kandidatu, Primeira Alterasaun Dekretu-Lei Nu. 31/2023 kona-ba Estatuto da Carreira Docente. Iha dekretu lei ida-ne’e determina sistema rekrutamentu manorin foun, liuhosi programa bolsa kandidatu. Ministériu Edukasaun mós emite Diploma Ministerial nú. 81/2023 ne’ebé regula rekrutamentu atu ingressa iha kareira dosente.

Prosesu integra iha bolsa mós tenke ho baze ba avaliasaun koñesimentu no kompeténsia neʼebé previstu iha artigu 30 Diploma Ministeriál nú. 82/2023, 22 dezembru.

Ministériu Edukasaun sei detemina lalais kona-ba medida tuir-mai, inklui periódu kontinua halo abertura fali ba teste programa bolsa kandidatu seluk hodi kompleta ba luagares 2.400.

Notísia Relevante: PN apresia Governu implementa teste eskrita eletrónika ba vaga bolsa rekrutamentu

Jornalista : Osória Marques

Editór        : Cancio Ximenes