伊拉宾德拜舒村开辟新路连接抵抗遗址

VIKEKE, 22  Agustu  2026 (TATOLI)-Xefe suku Irabin de Baixo, postu administrativu Uatukarbau, munisípiu Vikeke, José Baptista do Carmo, informa Programa Nasionál Dezenvolvimentu Suku (PNDS) ba tinan 2026 ba suku Irabin de Baixo mak loke estrada foun liga ba sítiu rezisténsia.

“Kona-ba programa PNDS ba tinan  2026 ami deside loke estrada foun ne’ebé liga ba fatin istóriku ne’ebé uluk ita-nia aman Jeneral Falur Rate Laek subar ba, ami konsidera katak fatin sira-ne’e bele sai sítiu turismu reziténsia iha área ne’ebá. Maibé, estrada asesu ne’ebá laiha, entaun presiza dalan atu komunidade sira hakarak ba vizita fatin sira uluk, fasilita sira bele la’o tuir. Tan ne’e, mak ami loke Estrada foun ida-ne’e,” José Baptista do Carmo ba Tatoli, iha suku Irabin  de Baixo, ohin.

Autoridade ne’e hatutan, estrada ne’ebé loke ho totál distánsia kilómentru 2.7, ho luhan metru lima (5) progresu servisu daudaun ne’e eskavatór foin kee  metru 500, sei falta kilómetru 2-resin.

“Estrada ne’e hahú husi aldeia Taradai to’o área Betulaku hamutuk  kilómetru 2,7 dalan ne’e di’ak, bele halo espasaun suku nian ita-nia comunidade sira bele hela tuir hodi haki’ak balada sira”, nia akresenta.

Estrada foun ne’ebé loke uza orsamentu husi programa PNDS ba tinan 2026  aloka ba suku Irabin de Baixu hamutuk rihun $27.

“Orsamentu PNDS ne’ebé aloka ba ami ne’e hamutuk $27 mil, husi orsamentu ne’e ami selu ba eskavatór de’it, tanba kada loron ida ami selu $700. Depois loke tiha mak ami buka tan dalan ba Governu hodi apoiu ami konstrui  bee dalan sira. Tanba orasamentu ne’ebé aloka ba ami sufisiente no uza ba estrada de’it, ami labele konstrui  bee dalan ka goron-goron sira”, nia subliña.

Alende ne’e nia dehan, estrada foun ida-ne’e konklui sei fó benifísiu mós ba komunidade husi suku Irabin de Baixo hodi muda sai tanba iha suku laran rai komesa klot liuliu iha aldeia Taradai.

“Estrada ne’e hotu ami-nia komunidade hamutuk uma-kain 30 mak hakarak muda sai. Estrada ne’e bele fasilita mós ita-nia komunidade sira halo movimentu ba kunua sira”. Nia akresenta.

Tuir  dadus, populasun suku Irabin de Baixo ho totál  hamutuk 2.624 ho totál aldeia hitu kompostu husi aldeia   Taradiga, Macausa, Macaqui, Beturia, Uatodere, Taradai, no Lacoloro Hoo.

Jornalista  : Vitorino Lopes da Costa

Editór         : Florencio Miranda Ximenes