g7+观察团向圣多美和普林西比提出五项建议

SÃO TOMÉ E PRÍNCIPE, 21 Jullu 2026 (TATOLI) – Misaun Observasaun Eleitorál (MOE) g7+, iha tersa-feira, ne’e aprezenta rekomendasaun lima ba autoridade sira São Tomé e Príncipe hodi reforsa prosesu eleitorál sira iha futuru.

Huis rekomendasaun hirak ne’e, foka liu ba padronizasaun prosedimentu votasaun, reforsu observasaun eleitorál, vijilánsia nasionál, edukasaun votante, konsolida prátika eleitorál ne’ebé di’ak no kontinua promove toleránsia polítika.

Misaun ne’e mós reafirma kompromisu g7+ nian atu kontinua fó apoiu ba São Tomé e Príncipe hodi hametin instituisaun demokrátiku sira.

Rekomendasaun sira ne’e fõ sai durante konferénsia imprensa kona-ba deklarasaun preliminár ne’ebé aprezenta hosi Xefe Misaun, Komisáriu Floyd Oxley Sayor, ne’ebé hala’o iha Otél Pestana, iha São Tomé, hamutuk ho MOE sira husi Uniaun Afrikana, Komunidade Ekonómika husi Estadu sira Áfrika Sentrál nian, no Rede hosi Jurisdisaun no Administrasaun Eleitorál Komunidade País Lian Portugés (CPLP, sigla iha portugés).

Rekomendasaun dahuluk dirije ba Komisaun Nasionál Eleitorál (CEN, sigla iha portugés), hodi propoin atu adopta prosedimentu sira ne’ebé uniformiza tinta markasaun eleitór sira-nia liman, hafoin ezerse direitu votu.

“Durante observasaun, misaun verifika katak estasaun votasaun balun uza tinta indelével, enkuantu sira seluk uza tinta permanente hodi marka eleitór sira-nia liman” dehan Floyd Oxley Sayor, hodi argumenta katak padroniza prosedimentu sira ne’e sei kontribui ba hametin konsisténsia administrasaun eleitorál no konfiansa públiku hodi garante katak eleitór ida labele vota dalarua.

Rekomendasaun daruak kona-ba hametin observasaun eleisaun nasionál. Misaun observa prezensa signifikante husi observadór internasionál sira iha sentru votasaun sira ne’ebé g7+ vizita, maibé la identifika observadór nasionál ruma ne’ebé akreditadu.

Kona-ba ida-ne’e, g7+ enkoraja autoridade eleitorál no sosiedade sivíl sira atu kria kondisaun sira hodi promove partisipasaun observadór nasionál iha eleisaun sira iha futuru, konsidera katak sira-nia prezensa kontribui ba hasa’e transparénsia, responsabilidade no konfiansa públiku nian iha prosesu eleitorál.

Iha rekomendasaun datoluk, g7+ mós husu atu kontinua hametin edukasaun sívika no eleitorál, no apela ba parte interesada sira atu intensifika kampaña sensibilizasaun, ho objetivu atu promove partisipasaun eleitorál bele informadu no abranjente liután iha eleisaun sira iha futuru.

Rekomendasaun seluk mak foka ba prezervasaun no konsolidasaun prátika di’ak ne’ebé observa durante prosesu eleitorál. Misaun ne’e konsidera katak prosedimentu abertura no enserramentu sentru votasaun, kontajen votu no anunsia rezultadu provizóriu no akta hala’o ho forma transparente no profissionál. Aktu ida ne’e tuir g7+ nia observasaun, kontinua hametin prátika hirak ne’e no aplika ho konsistente iha eleisaun sira iha futuru.

Rekomendasaun dalimak, g7+ subliña importánsia atu kontinua mantein ambiente toleránsia polítika no partisipasaun pasífika ne’ebé observa iha prosesu eleitorál.

g7+ enkoraja kandidatu sira, partidu polítiku sira, no atór sira seluk atu kontinua fó prioridade ba diálogu, respeitu ba instituisaun demokrátiku sira, no rezolusaun ba disputa ruma liuhosi mekanizmu legál no institusionál sira ne’ebé existe iha nasaun ne’e.

Floyd Oxley Sayor lori g7+ nia naran hodi reafirma kompromisu organizasaun nian atu kontinua apoia São Tomé no Príncipe liuhosi kooperasaun “frajilidade-ba-frajilidade”, mekanizmu ida ne’ebé sei permite nasaun membru sira atu fahe esperiénsia, koñesimentu, no prátika di’ak sira hodi hametin instituisaun demokrátiku no reziliénsia Estadu nian.

Xefe Misaun hatutan tan katak organizasaun ne’e sei kontinua kolabora ho São Tomé e Príncipe ba promosaun demokrasia, pás, estabilidade no dezenvolvimentu sustentável, reitera katak hametin instituisaun sira hanesan elementu esensiál ba konsolidasaun Estadu Direitu.

MOE g7+ agradese ba CEN São Tomé e Príncipe ne’ebe konvida ona organizasaun ne’e hodi halo akompañamentu ba eleisaun prezidensiál loron 19 fulan-Jullu no reitera katak misaun ne’e sei kontinua iha nasaun to’o loron 24 fulan-Jullu hodi kontinua tau matan ba prosesu pós-eleitorál molok hato’o relatóriu finál.

Notísia relevante: MOE g7+ konsidera eleisaun prezidensiál iha São Tome e Príncipe livre, justu no transparente

Jornalista: Afonso do Rosário

Editora: Isaura Lemos de Deus