FALINTIL51周年纪念仪式在强风中举行

BAUKAU, 20 Agostu 2026 (TATOLI)–Serimónia komemorasaun tinan 51 Forsa Armada Libertasaun Nasionál Timor-Leste (FALINTIL) ne’ebé hala’o iha Suku Abulir, Postu Administrativu Matebian, Munisípiu Baukau tinan ne’e la’o ho situasaun anin-boot.

Anin hahú kedan iha Kuarta (19/08) kalan ne’e to’o agora la para, hodi rezulta tenda ne’ebé komisaun monta tohar hotu no komisaun deside alta entidade sira hola kedan fatin ne’ebé prepara ba bainaka espesiál no importante sira hodi autoriza sira tuur de’it ona.

Maski ho situasaun ne’ebé ladún di’ak tanba anin-boot maibé serimónia komemorativa ne’e kontinua la’o.

Nune’e, parada ne’ebé komanda husi Kapitaun Fragata Guido Guterres hodi husu autorizasaun ba Inspetór serimónia hodi hahú serimónia.

Notísia relevante : Komandu F-FDTL realiza marsa iha Foho-Matebian

Konvidadu espesiál Prezidente Repúblika no alta entidade sira seluk tama iha serimónia fatin hodi hahú serimónia.

Tenente Koronel Abel da Xavier ‘Niki’ fó aviza katak tanba serimónia komemoativa tinan 51 la’o iha situasaun ladún di’ak, husu ba konvidadu espesiál sira atu mai tuur de’it iha fatin ne’ebé komisaun prepara ona.

“Orsida konvidadu sira mai tuur de’it ona ida leten ne’e. Kuandu tuur labele hambriik tanba kuandu hambriik anin sei lori kadeira sira hotu,” Tenente Koronél Niki hateten iha fatin serimónia. Kinta ne’e.

Serimónia komemorasaun tinan 51 FALINTIL ne’ebé halo iha Abulir pauza tiha oituan tanba anin ne’ebé kontinua boot la fó fatin ba eventu la’o tuir protokolu normál.

Maski nune’e ho situasaun anin-boot, maibé la hamate komunidade, veteranu no estudante sira hodi kontinua hakat ba fatin serimónia.

Jornalista : Natalino Costa

Editora : Julia Chatarina